20220403 撮記

　　九點半醒，九點四十沖完涼。上天台淋花，蕃茄爛左，羽衣咁藍被食😫

　　唯有將精神寄託放係士多啤梨🤗

　　十點開車，十點三到彩虹，食陸爸買既彬記早餐。

　　返彩虹時，見到前車拖住一個Trolley，令我諗起我以前經常都用到，唔知前車係咪去西貢呢～

　　今日要清明拜山，所以先返彩虹，再車陸爸出去。食早餐時，陸媽分享左一單新聞「韓國軍機相撞墜毀 3人遇難1人失蹤」，我默默記下，因為可能可以分享比韓仔。

　　十點四十出門，十點五十開車，十一點一到葵芳，泊好車。十一點三見到雄仔，上的士，十一點半到火葬場，先拜爺爺阿媽，爺爺阿哥。

　　十二點四拜爺爺，一點一走。

　　可能同我經歷有關，有時我會幻想，可能另一個世界其實同監獄一樣，有人「拜山」既會過得好Ｄ，無人「拜山」既「死火山」，就可能過得無咁好了😂一諗到係咁，我依稀有僅存回憶既爺爺，我都希望佢走左後都會活得好吧。

　　看見陸爸，我依稀覺得，有點似獅子王故事內的辛巴爸爸(木法沙)，佢此時此刻，可能回憶緊同自己爸爸的種種，又可能覺得自己他朝一日，就由我頂替佢此刻既位置，當然我永遠不會知道佢諗緊咩🤣

　　同雄仔分享近況，我分享Christian 轉新工加人工，佢而家做app，炒股app，其實將來儲夠經驗，都升到上去，係睇佢想唔想做。

　　一點一火葬場走，一點三，同陸爸雄仔食元氣。兩點五食完，陸爸埋單。由於疫情，今年去唔到沙田同粉嶺拜山，之後雄仔搭鐵返大圍。

　　兩點半葵芳開車，兩點十一到大埔，我坐陸爸車尾，相信係香港可以坐爸爸電單車尾的人，都算幸福吧😂比我係吐露港見到有架「邊三」，好型😍。

　　陸爸買水果比老人院阿嬸，而家無得見面，無得見家人，物資放係門口比職員轉交，十足坐監😥甚或慘過坐監。

　　三點四大埔走。四點到灣仔，四點一上灣仔電腦城，買左1500蚊兩隻4TB Seagate hard disk，陸爸有一千蚊coupon，佢無用，正好拎黎upgrade synology。

　　四點七灣仔走，四點九北角入油。

　　五點二到樂富，我係車等陸爸去買今晚既晚飯。比我睇到群組入面有關插秧既相，事關我約左聽日去二澳插秧😂

　　五點五陸爸買完餸，樂富走。五點四十到彩虹，拎左防疫包就上樓。

　　陸媽今日播E首歌，好熟，但終於知道叫咩名了😎

　　七點晚飯，食彬記。上網睇到張Meme 圖，令我諗起上星期五既裝printer😂uninstall 仲耐過install🤣

　　明天入二澳，所以我食完晚飯後都早作準備，早D走。搵左主辦方整既二澳地圖，明天將算得上是我係香港去既「偏遠地區」😂希望明天的體驗是值得的❗

　　九點彩虹走，九點四到旺角。返到旺角，今日都有派防疫包，不過旺角無人所以無人拎，會有張紙通知你去拎。

　　上天台淋花，斟水，洗衫，曹律師分享左佢對「擦音」既中譯版，我自問唔識欣賞😂但好開心佢分享比我，有一股淡淡既人情味😊我一字不改地放在這裡，希望將來有懂得欣賞詩詞既有緣人黎交流下吧😂～

“擦”音

能說好英話，李太云：你要學會
三(three)同自由(free) 的發音的分別。三/自由人
用救生艇
逃離Alcatraz 到天使島沈死途中。聽到嗎？試
以下：
你一生爭扎求全。好👌。立
此全照。打鮮黃稻麥
直到種子分離。這是打谷。這
是歸順。
你可以先學習歸順才可開始學習。
你要被有發言權才可以發聲。
沒有人想聽一個載著眼鏡香港仔口音。
你要離開此城此地，一個充滿前人枯骨的黑洞。
知其死亡的完全。
你所言的充満傷痕累累的身軀
比你還要瘦弱
迫使筆幹閃過黨牌和瘀血
美其名新材料寫作
現在佢備受關注
你是那云云的幸運兒
仍然可以關注那舌頭的運用
那七種的擦音
牙齒發音的作用
都靈生存
你接受海外良好教育唔令父母自豪

遇陌生人的陽具在口中
在那光澤的stall
那味道是來自你家鄉
全香港製造

母親一個10月的來訪
告訴你這裏的人都有不同口音
是那麼正統
你笑點著頭帶她去你最喜愛的中式餐廳，用英文叫點心。
佢哋釋放學生五年前被拉的
唔該可唔可以俾多啲豉油
電視重播着昨天的節目
茶壺的水已經重添
你用匙羹送飯到你口中
那完美的飯
蒸熟的,完美的,順白的

　　講起又講，今日又有Facebook 評該首詩，我覺得好好，特此分享😝

　　夜晚，Mani 問我書😂Parity Bit，真的是考起我🤣好彩我都算講得明白～