20220201 撮記
昨晚三點才睡，今朝醒來已是十一半，大年初一，打比陸爸，約了時間十二半到倫敦大酒樓。
十二點沖涼，十二點四出門，行八分鐘就到酒樓了。陸爸已到四樓開枱，而我卻不小心搭𨋢上了三樓混左陣桔🤣下次要好好看message了。
見到陸爸後，立馬換了白爛貓利是封，起初陸爸是不願意的，但經我說服後就可以了，說到底也有紀念價值喔。未竟，Mani 都到了，仲帶來了禮物添，我地閒談近事，有關打針呀，茶葉呀，波鞋呀，其實無咩新年氣氛，但就我而言幾舒服。閒談之間我搞錯左一個烏龍😂原本我以為陸爸陸媽當年係係Ｅ度倫敦大酒樓擺酒的，但原來唔係，係彌敦道對面既五月花酒樓，而家已經執了😢。
1340 埋單，陸爸派發白爛貓利是，Mani 收到好開心😼之後我地決定陣間去尖沙咀the one 睇鞋，因為陸爸有coupon。出酒樓後短逛了樓下的阿希泰，然後1349 就上6號巴士，兩點到the one。先上五樓new balance 睇鞋，因為陸爸早幾日已經睇中了一對鞋， 佢覺得鞋面係防水、鞋底係行山料，十分適合我，所以由始至終都係想我地D後生既按佢劇本黎行😂我心諗，有一千蚊coupon 都唔買E 對啦，有點為買而買，仲要著既人係我，仲要今日係大年初一，新年流流買鞋，「鞋」足成年呀🤣
我於是決定唔買，行下商場，上樓上IＴ睇，得知邱淑貞同甘比係老友，所以ＩＴ開係廿比期下商場真係唔出奇，然後落樓下ＡＥＯＮ 行，有Mani 最鐘意既十二蚊店，亦有一個超級市場，陸爸買了一些雜糧，我買了一盒芝麻糊沖劑比陸媽試。
我發覺陸爸知道唔買鞋後有D失落，加上佢其實本身無咩需要黎the one 買野，佢係為左對鞋去換the one coupon，而點解為左對鞋？係因為見到我著緊對黑色tiger 爛得都幾犀利😅 種種原因，搞到我決定今日用左佢，反正都唔會有時間再黎the one，難得大年初一，咪當買一個回憶，又花不了幾多錢，無謂要老人家失落啦，按佢劇本走都無壞。於是我地又上返去買鞋。本身我想買跑鞋，但價錢唔過一千，而且跑步我prefer tiger，至於果D 潮鞋（９９６ 果Ｄ），我根本不感興趣，仲記得當年去英國，子良托我買Made in England 既 New Balance，我當仲要無買（因為行李無位😆）。最後買左一對行山鞋，扣左coupon 只需71蚊，４１號半，算係最適合我的選擇了，而且鞋底好厚（即刻有自信了😎）。
買完鞋已經三點，同陸爸去搭巴士，佢返彩虹，我同Mani 去旺角，行朗豪坊市集，佢想行H&M但完來已經執了，三點八返上5樓。本身想打陣overcooked，但Christian 打緊😂仲搞到佢Fifa 輸左。由於天台有南亞係度開餐，費事大家面阻阻，我同Mani 執Arduino，佢教我用object block ，上object block官網，開account ，然後係手機裝Objectblocks tools app，Configure arduino 底版既wifi connection。就可以係官網上行program run 了😎花了少少時間但總算回憶返番黎。
之後上天台，見到有蕃茄，士多啤梨都有😍希望唔好比人偷啦。
四半送Mani 走，四點五十五到九龍城，五點二到彩虹，陸爸出左去買餸，我同陸媽閒談一陣，然後我打機，佢聽收音機，大約六點，陸爸仲未返，我決定開電腦睇戲，搵左沙丘瀚戰黎睇。陸媽想連去大電視機睇，我問有無HDMI ，竟然比我搵到，係之前我上tecky 果條，長度仲要岩岩好，插到去屋企部desktop，不過dual mon 連就連到，但我睇唔到果大電視網，比條梯擋住，於是就同陸媽玩「二人三足」🤣佢比指示我拖隻mouse 去按放大鍵。
夜晚晚飯，陸爸買了雞買了餸，閒談中提到了我去邱家拜年，我問陸爸有無去隆亨邨拜年，陸媽好大反應，原來這是陸媽的一條刺，那我即刻轉話題啦🤗陸爸買了新手機，之後一邊睇戲一邊幫陸爸過資料，都幾煩，不過最後完成。過wechat Data 時最煩😂登入新手機wechat 需要舊手機wechat 去掃瞄QR code 或者兩個朋友去message 一段pin code 比陸爸才可以。陸爸舊手機相機壞了不能對焦，而第二個方法，我係佢其中一個朋友，但陸爸揾唔到第二個😅因為陸媽無wechat，而大年初一陸爸怕尷尬唔知問邊位好，Anyway，佢最後搵到人，搞掂了。
當初我換手機wechat時，係無update 返以前既對話紀錄，一來我無興趣留（都唔用wechat 😁），二來唔知道可以做到備份。今日竟然比我搵到備份對話既方法，即刻幫陸爸還原備份，仲比我搵返碩果僅存既相，真的好難得❗ 亦勾起我好多回憶，不免有點感概。
西藏的回憶，當時我報平安比陸爸，我搭火車了。
最重要竟然比我搵到中科院實習時既宣傳片😆❗係我人生中一段好重要既回憶，00:17 至00:19 我有上鏡的😎當時其實覺得好開心，而家望返都不禁緬懷在北京的日與月，我有機會實在要記錄返當時的生活。
十一點走，其時睇緊明珠台既哈里波特阿茲卡班的逃犯，睇到一半。我十一點二十返到旺角，Back up 手機相，睇埋哈里波特阿茲卡班的逃犯，而且寫blog 😆好耐無執筆了，但我今日有feel。約一點，我睇廿二世紀殺人網絡４，一邊睇，一邊寫撮記，感覺很熱血，虎年第一日就做左咁多事，又拜年又買鞋又Arduino又睇戲(前後三套)又過資料又寫blog，算係一個不錯的開始吧🤗。