月份: 2021 年 3 月

大地行者 3月28 日春天草草實習 @ 南涌 1000

先附上教案。

春田草草活動第1稿：24_3_2021-2-1-1

　　我地九點七到南涌，點知原來一念晨曦一早已到，佢大約八點就到，周圍走，摸索環境，憑這點已看出她很重視今次實習😂今次我地實習的主題係「親子、樂活、森林浴」，我地邀請到冬菇仔的家人，以及春天草草的島仔日光阿花，仲有羚月和我女友參加，今次的觀評知己／導師，我地也邀請入組一齊玩😆

　　我們約了大家十點鐘，預埋buffer time，我地十點半開始。原定我們是打算在涼亭進行熱身遊戲，感謝小草的建議，我地去了到涼亭後的小空地，這是一個較好的草地去進行活動，不過較多蚊。

　　一開始，大家都是剛剛來到南涌，未完成適應，我們準備了「排出年齡線」、「動植物森友會」和「動物大發現」來讓大家互相認識。

　　之後，十一點半離開草地，我們去了紅樹林，進行寫真。沿途有大馬路，所以提醒了大人要注意身邊小朋友的安全。

　　之後，我地去到紅樹林，我地進行了寫生同埋睇彃塗魚。

　　去到十二點半，我地返去停車場休息，而且讓參加者去車上拎午餐，去公廁疏洗。

　　一點入到去秘境，天氣炎熱，所以感激一念晨曦連同其他大地行者義工率先入去set 好帳篷，讓大家可以更快去午餐。

　　午餐時不忘要水修行😎

　　午餐後，小朋友們去了不同地方探險，而大人則留在草地休息，我跟著小朋友們，竟然發現秘境之後竟然仲有秘境！

　　之後，我地返會秘境，繼續我地下午的活動—午睡❗🤩

　　天氣真係好熱，我地為大家準備了「大地之窗」，躺在大地上的感覺，很舒服，很自然～

　　最後，看得出參加者覺得天氣太熱而不能投入，我地取消了本身的動態活動，提早進行總結，邀請大家出黎分享自己剛才的畫作，然後送比父母或大哥哥大姐姐，畫面溫馨。

最後，我地進行大合照🤗完滿結束今天的活動。

　　我地四點完，我帶走了所以廚餘，打算待會拎入養地協會做肥，然而我地送走了參加者後，我們和天空debriefing到五半，從自讚到他讚，總結整個實習的好與不好，可改善的空間，全都一一寫在實習報告內。

　　五點九我揸電單車送廚餘，女友在士多點了一份雞脾（聽講係last order！）同埋豆腐花😋。

附上實習報告

20210328-signed2

大地行者 3月26 日情意溝通法 @ 兆基書院 1900

　　今日六點四十出門，七點到兆基，後天就是我同冬菇仔同一念晨曦的實習，準備了教案打算今天傾傾。

春田草草活動第1稿：24_3_2021-2-1-1

　　上清水老師的堂，由於未齊人，我地一開始做左陣平甩功。

　　之後七點四開始上堂，一開始又係回顧下「三三修練法」既道理，比如「心法」、「技法」同「原則」，之後開始第一個活動，我地進行了盲行，聽住清水老師的笛聲，然後當笛聲停下時，向最近的人分享，規距得一個，就係「不要交流」，你做聆聽者時只需要聆聽，不需要比feedback。

第一條問題：「今日做左咩，有咩感覺」，我同雨點分享，佢同我今日都係返工。

第二條問題：「今日做左咩有意義既事」，我同晨曦分享，佢做左植物醫生（interesting🤨），我分享幫人debug。

第三條問題：「最近一件唔開心既事」，我同阿柑分享，佢同朋友相處不好，我分享有位朋友因理大而去了英國。

第四條問題：「一個識溝通的人」，我同流水分享，佢介紹了台灣的一位高人(我已忘記了姓甚名誰😂)，我分享了vera。

第五條問題：「一個錯誤的溝通」，我同種子分享，佢係分享佢同父母既溝通同誤會，我分享了我以前送生日禮物比朋友，佢當住我面扔左佢。

　　之後大家坐返好，清水老師簡單講返技法的五點：回顧(Recall)、感受(Reconnect)、讚賞(Recharge)、檢建(Reuse & Rebuild)、主題交流(Recycle)。大意就係叫你直視過去，再用以上五點，諗下該次溝通如何做得更好。

　　接下來，再次兩人一組，問返剛剛第五條問題：「一個錯誤的溝通」，試用「技法」五點來答，看看有否分別。今次同我分享的是阿柑，佢同我講佢以前同人表白的事情，我同佢講份當住我面扔左生日禮物的事。大家都明白傷口一旦出現，就算癒合了都會有傷疤🤗大家都很成熟。

　　今天最特別的是「不要交流」的規距，要只聆聽不互動是很難的，但同時亦感覺到，只聆聽的空間較大，對方不會被你影響或帶走，較易疏理地講下去，情況有如聽人唱歌一樣，不受互動影響才能唱下去。

大地行者 3月21 日春田花花實習觀摩 @ 鹽田梓 0930

　　今日準時到西貢，十點二到鹽田梓，今天我和春田草草的冬菇仔同一念晨曦，仲有女友Ｍani 一齊去觀摩島仔、日光同阿花的實習，參加者係日光既以前學生，現升上大學，還有島仔的教會朋友。

　　今天春天花花的實習主題係「Date with Trees」

　　因為今日有第二組都係鹽田梓實習，所以大家要互相遷就共用地方。所以我地一落船，就去左下面既沙灘玩遊戲，猜猜背後的圖片是甚麼？只可以問是非題。

　　我抽到的是芒果，所以今天我的自然名就是芒果了。而女友的自然名今天就是蘋果了🤗。

之後我地上簡樸居，玩了扮樹遊戲。

之後，我地去了樓上草地，正好上面另一組實習生剛用完了地方，正好交換😊由日光介紹樹，感受樹，再分組搵樹，再聽樹。

　　之後，我地去了舊碼頭午餐，今次的要求是獨食，希望大家不要傾計，好好享受當下美景以及眼前的食物。冬菇仔做了一個完美示範😎

　　食完午餐後，我地上返去簡樸居，玩了一陣自然大風吹。

　　玩完後，我們上上面草地，起火。

　　先用小遊戲同大家玩自然收賣佬，收番黎的自然是生火用的材料😂我地竟然搵到不同的生物，比如蠄蟧！

材料準備好後，便可以開始準備生火了🤩

最後，由島仔帶領大家，一齊去作詩，「假如我是火」，最後很成功地寫了一首詩出黎！是大家一起創作的！

總結部分，每人先揀三塊你最鍾意既樹葉，然後大會問三條問題，同三個人分享答案並送出手上的葉。

完結後，仲有時間，於是島仔帶大家去行一行鹽田仔，而我同女友則去參觀鹽田仔博物館同鹽田仔教堂。

跋：

感恩今天是十分充實的一天！春天花花帶得好好，即使所有活動都玩過，但卻不覺得生厭，十分投入😄

大地行者 3月20 日春天草草實習pre-trip @ 南涌 1000

今日我和女友約冬菇仔同一念晨曦去南涌pre trip，我地一點到了南涌，食左強記士多的豆腐花🤗大約一點四十終於齊人，我地便坐係亭內開始討論。大致上知道受眾係冬菇仔的家人，而地點應該就係秘境。

我地諗左要準備一D intro Game，然後就係去探險、寫生、觀鳥和執垃圾，而主題係同大自然做朋友。

於是我地係附近行一行，這是和班房教學非常不同的，就是野外教學一定要pre trip，如果你未去過或唔熟悉該地方，就會好易出事，同理，做導賞員都一樣。

我地先行出去廟果邊，然後找到一個不錯的海境！可以比參加者玩水筆仔或者玩遊戲。

之後我地沿海邊走，去到另一個秘境！這裡很適合用作寫生呢～

見到鷺鳥

之後我地行返去秘境，這裡我地決定就是最後午餐的地方，我們還需要考慮時間和拎物資，不過已知冬菇仔的家人都有揸車，所以其實還好。

竟然比我地發現了蛇皮！相信很適合用作尋寶遊戲😍

　　最後，我地都行左入去邨同埋行左入去農場，但認為太遠了所以不打算去，just in case如果最後落雨，可以用黎做backup plan。我地行入去養地協會後，認識了小樹，原來她是同大地和浮雲同一屆的大地行者～

最後我地五點半走。走前又食多一次士多豆腐花🤣

跋:

附上最後的教案。

春田草草活動第1稿：24_3_2021-2-1-1

20210316 撮記

八點五十三分醒，九點五開車，九點十到炮台山，拍卡後買19蚊早餐，精神開工！

一點四午餐，看了一篇文章，《知道「沆瀣一氣」點解嗎？》，今天仍然是問客拎料，老實講個客無比料我我都做唔到網頁出黎，得一個框，自己作比佢。

夜晚約了JCI開會，四月月會準備，七點四收工，七點五開車，七點九到佐敦恆成大廈，今日初次見面，都係聽多，知道自己負責拍賣會既宜傳，需要同設計師溝通，去整PPT 、 E-banner 、大支票，又望左之前既其他商會既拍賣會，賣蠟燭，而我又發現其中一個蠟燭比我地會長買左，今日上左佢office ，所以睇到。

　　開完會食完野，我地幫手pack 整齊已有既拍賣品，種類都幾多下：

其中一個我覺得幾吸引既係「一疊美金」，看圖看影片就明白的。

　　整到十點十一走，十一點一到家。Bowie 搵我，關於網頁同埋我既近況，傾到夜晚三點幾先訓。

跋：

　　今天學了新字沆（行）瀣（械）一氣，感到有點開心，我時常覺得自己不是電腦的料子，我是喜歡文學思哲的，但卻偏偏走進ＩＴ的世界來，可能是冥冥中自有天意。今天更認識了JＣＩ，開始對商會有多一份認識。

20210315撮記

　　今日八點十一醒，九點四出門。九點九到炮台山。

　　今日Christian 整左一個換面app ，好搞笑可以key朋友的面做搞笑的面部表情。又知多樣同AＩ有關既野。

　　朝早在公司上react 堂，亦揾到了一個css 的YouTube 教學，看得出好有心機整。

　　公司請我返黎寫網頁，點知而家做左Facebook chatbot ，仲要對客。四點四十分，落樓下天仁茗茶買27蚊普洱拿鐵。

　　我其中負責既一個網，揾好西，賣好多有趣野，https://www.onehosite.com/products/shiba，這是其中一例。在此幫佢推廣下。我不禁在想，我既然都學了，將來都想整一個網站賣野。

　　我由於上星期早走兩個鐘，今個星期一要OT返補鐘，所以我比其他人遲走。當大家收晒工，幾個長工佢地入房同老闆電話開會，我坐左去另一邊，同ruby 吹左陣水。八半佢地開完會，趕我走。從volar 口中得知Henry 今日請假，應該又走了。公司打算放佢無薪假，放到佢返工為止。Volar 又講起佢以前七年前入行，人工有11500。所以而家算高好多。

　　八點五十開車，九點二到紅磡報到。九點四到Mani 家，因佢要滑鼠做野，亦送了我一支祈福旗🥰

九點五十紅磡走，十點到彩虹。凌晨十二點的起心肝學react ，唔入腦。聽朝又要返工，訓返。

20210314 撮記

九點醒，九點二十出車，九點九到西貢。十點上船。今日大地行者情意攀樹。

今日海鳥帶，一開始簡單介紹同熱身，分左幾part 比我地試。例如攀樹、踩獨木橋、人造轎等。我一去就去左攀樹，原來係用繩自己吊自己上去，有點攰，但可接受。

　　上到樹頂的感覺很奇妙，有點累，但又很舒服。

　　之後我地幾人爬上一棵老樹，本身都有D驚會跌會受傷，但最後原來這樹可容納很多人在上面，海鳥更拎了長剪去幫佢修枝😃

　　食完飯後，有一段小休時間，我更特地同島仔爬上剛才的榭，晀望修枝後的風景！

　　下午，落去了樓下創建之路攀樹，是一棵大樟樹。有四條繩比四個人同時攀，又有「情意升降機」，又有難度極高的「繩梯」。

　　當大家在排隊上樹時，有兩條很好玩的韆鞦供我們fing 黎fing去😂

　　大約四點夠鐘，活動完結，很遺憾在debriefing 時，得知原來剛才鹽田仔村長黎過，佢話原來我地下午攀的大樟樹對邨民有特別意義，有人投訴，加上公眾地方我地有少少阻路，所以今次應該係最後一次爬這棵樹，村長話本已知我地搞爬樹活動，但唔知原來係E棵大樟樹，結論就係以後爬返今朝爬既樹，樓下這大樟樹唔好爬。

　　儘管不知者不罪，但這也讓我明白這樹是邨的「風水樹」，即使我地唔係破壞佢，而係同佢玩，與大自然共樂，但邨民的心卻不是這樣看，明白的，也只好尊重。所以很遺憾地應該是沒有機會再一次在這裡這棵樹搞攀樹活動了😥。

我地四點五十五分走，五點三上船，離開時心裡百味雜陳，一時又覺得今天很難得，一時又很可惜今天只有一次，真的要活在當下。

　　，五點半到西貢碼頭，十點七開車，六點一到將軍澳。因上次在旺角迪卡儂，問了職員現只有將軍澳迪卡儂有厚手套賣，因為轉季了，所以冬季用品搬晒入將軍澳既倉內。六點四上3樓迪卡儂，好大🙀，行一個圈，玩左滑板，同職員講左想拎手套，要等十至十五分鐘，之後去左麥當勞，飲水買炸雞翼頂肚。

　　六點五十五分買左一對89蚊既手套，七點落返車度同tony 傾電話，約左星期二晚要social，有關四月月會，七點四入油，138蚊7.3L油。

　　七半到家，一個簡單晚飯。九半出門，九點五十紅磡報到，十點上邱家，整YYLAB。十二點半邱家走。一點到家。

跋：

今天是真的挺充實，但也很累，但我卻覺得很難得，畢竟沒有甚麼機會可以進行今天的活動，很記得吊在樹上看鹽田的感覺，很自在，像一隻鳥。

大地行者 3月14 日情意攀樹 @ 鹽田梓 0945

九點醒，九點二十出車，九點九到西貢。十點上船。今日大地行者情意攀樹。

在船上，有一個課前任務係找出一首你很喜歡的歌詞，我在船上看見大家都在準備，忽然看見隔離阿根正在寫房東的貓的《美好事物》，於是勾起了我在北京的回憶，然後就決定了，我寫房東的貓的《往往》。

又來到簡樸居了！

　上到樹頂的感覺很奇妙，有點累，但又很舒服。

　　之後我地幾人爬上一棵老樹，本身都有D驚會跌會受傷，但最後原來這樹可容納很多人在上面，海鳥更拎了長剪去幫佢修枝😃

　　食完飯後，有一段小休時間，我更特地同島仔爬上剛才的榭，晀望修枝後的風景！

　　下午，落去了樓下創建之路攀樹，是一棵大樟樹。有四條繩比四個人同時攀，又有「情意升降機」，又有難度極高的「繩梯」。

　當大家在排隊上樹時，有兩條很好玩的韆鞦供我們fing 黎fing去😂

　　海鳥為今天作了一首詩，在此一記：

情意攀樹三月天

一步一步攀樹顛

樹上知己成生趣

樹下手足一條心

願君珍惜好年華

愛在瘟疫曼延時

　　最後清水補充，今天正是三月尾課堂情意溝通法的活生生例子，我們要認真看待自己的感覺，需要捕捉，需要說出來。

　　我地四點五十五分走，五點三上船，離開時心裡百味雜陳，一時又覺得今天很難得，一時又很可惜今天只有一次，真的要活在當下。

20210313撮記

　　今日九點二醒，九半開車，九點五十到炮台山，儘管是星期六，但仍要開工，返半日。學Monday，學Facebook ManyChat Chatbot，簡單易用，Time consuming only。

　　兩點收工，兩點二開車，兩點九到旺角，今日約左fanny 食飯。三點四入座同fanny 食飯，走到五點四埋單，224蚊，本來我比左，但fanny太客氣找返150蚊比我。佢有一段好豐富的人生，佢28歲去加拿大，35歲返香港教英基小學，然後提早退休，過日神。我地傾左大館、義工、教書，亦傾左移民，講左度度都有歧視，在乎你有無錢能力移民，是一場高質的飯局。

　　食完飯後就送走Fanny，五點五十到迪卡龍，早幾日比人偷左電單車手套，所以買左一對特價單車擋風手套，79蚊，頂住先。

　　有一個小插曲，就係係迪卡龍行行下我人有三急，於是著Mani 繼續逛住先，我先去商場廁所，而我去廁所時有一個習慣係鋪紙巾，以避免和廁板接觸，忽然有感這種做法其實係陸爸在我小時候帶我去廁所時教的。所以第一印象好重要，習慣左就唔會改，純粹有感。

　　返到去迪卡龍，六點半埋單買手套，之後行返去車時，我地見到busking，支持一下。

　　七點二走，七點二十五到紅磡晚飯，搞掂左舊年Mani 係PMQ 做野拎返黎既object block，原來要連手機同埋有D network setting，先可以配對到相關既object block。另外，亦用了銅泊紙做了一個小型電路，很基本，但卻喚醒了我對科學的熱情。我經常想，如果以前我的科學堂有很多實驗給我去試，我的科學知識應該會更踏實一點😂。

　　早前幾日Mani 去了觀音借庫，為我借了「一億二千萬」，我今天終於收到了！十一點四十分走，十一點五十分報到，十二點二到家。由於明天要早起，去大地行者攀樹，於是很快地去了休息。

　　九點二醒，九點五出門，九點十到炮台山。今日做好基本既standard low 網頁，相對輕鬆，一點一食lunch ,同Monica alex食野，食到兩點半返去。我講左我三個月內走，提Monica要再揾人。傾計中聽Monica 講agency 既辛苦，monkey tree果邊違約，同Adlinkage 差唔多，而家告緊佢，最後monkey tree而家無請任何tecky 學生。亦有分享到有D agent 雖然廢，但勝在有背後network，可能係大公司相識，所以Agent 係人不可貌相的。

　　今日六點四走，我七點要到兆基上大地行者，估唔到見到sandy，原來生活行者同大地行者有過合作，所以sandy 今日就黎sit 堂，佢都識D人（包括我😂）。

　　十點走，走時同日光羚月架車say hi ，感恩仍有呼吸，能開車，不簡單十點二到家。

跋:

今日睇刊E篇文，有時間時要重溫：

這位教授上架 20 堂免費「深度學習」課程，獲 Reddit 網友真心好評：作者是英雄

https://buzzorange.com/techorange/2021/03/11/reddit-system-learing/

2021 年 3 月
一	二	三	四	五	六	日
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31