分類: 撮記

20210228 撮記

　　今天約了小丸子，去他的農埸幫手。九半醒，遲了少少，立即疏洗趕去紅磡接Mani，十點一接，十點四十到八鄉無國界義工。跟住Google Map 行左入去，入到盡行錯路，於是搵小丸子，怎料他就在後面。原來他比我早到，本打算在門口集合，卻料不到我直接入村，追都追唔切🤣之後我地一齊除草翻田，落肥種樹(小丸子買了一幅地，插種了一棵芒果樹)。

  • BEFORE
  • AFTER

　　第一次來到這農場，地方很大，面積大約有一個足球場，農場主人用平方米來租出去，平均三千蚊一年租一百呎的農地，碰巧小丸子的農地旁邊的農地剛好退租，多了兩行農地待租，於是問我有無興趣，我覺得除開三百蚊一個月還可接受，地方遠但我有車所以還好，只是擔心未必有時間打理（尤其是六月後），但反正沒差，先租了再算。我很開心有此機會，加上老實說這也是一個機會多見見小丸子，所以便答應了租田，細節再安排。

　　兩點離開農場，出去錦田郵政局。出村前幫小丸子同阿珊截了的士，然後出到錦田便找了一間餐廳食野。其時正值兩半，點了四份茶餐，我們由於四點要生活行者的zoom，所以我地好快食完，小丸子想介紹一下錦田比我知，所以我地三半去左係附近的吉慶圍，小丸子作為一個專業導賞，講了「鐵門事件」，大意是當年1899年英軍攻佔新界，吉慶圍當時是一座圍城，有護城河和城牆，當時錦田居民不甘做英國的屬民，以吉慶圍為據點，與接管新界的英軍展開血戰，最後關閉鐵門，以圍牆、護河抵抗。英軍屢攻不下，最後以大砲攻擊，攻入圍，居民多有死傷，現時逢吉鄉妙覺園裏的「英雄祠」，就是埋葬當年被殺害的無名英雄。英軍佔領吉慶圍後，拘捕反抗的居民，並把連環鐵門拆除，運回倫敦作戰利品展覽。

最後吉慶圍居民對失去祖傳鐵門耿耿於懷，屢屢要求索還不果。及至1924年，族人鄧伯裘再重提舊事，要求交還鐵門，港府遂將事件轉達英廷，輾轉在蘇格蘭尋獲鐵門，運回香港。1925年5月26日下午4時30分，香港總督司徒拔親臨主禮，舉行交還鐵門儀式，並立碑誌其事。

看得出是小丸子覺得重要，才會和我講的。吉慶圍附近亦有不少有趣景色，我們亦拍下鐵門照，在香港歷史博物館中的鴉片戰爭館中，有一對鐵門就是仿照吉慶圍鐵門而做的。

　　之後小丸子更帶我地去埋錦田紅磚屋市集，雖沒有歷史故事，但是很高興入去兜了一個圈，更看到一隻很可愛的羊！小丸子知道我地趕時間，儘管我已同佢講不緊要、可遲的。最後我們在三點五十五說再見，阿珊同小丸子繼續在市集購物。

　　由於遲到了，而且附近沒有wifi，反正遲到了，索性入屯門生活書院zoom，四點錦田走，四半到。

　　仲見到叮叮😻😻

　　四半至六半開會，傾了科技篇在星期六的安排。然後玩貓。亦被我發現了仙人掌，咁大棵第一次見，仲要開花！

　　之後我們七點離開生活書院，七點四十到紅磡晚飯，整晚在講股票，其實我較響往平實有內涵的溝通，比如我媽媽會跟我講范曾是她喜歡的畫家，我很喜歡聽這些的。感覺黎黎去去都係講賺錢有點累，但現實卻是要講賺錢……之後我同Mani 細佬傾股票，同Mani 傾STEM，十一點九走，十一點五十五報到，然後回家，充實的一天！

　　最後踩在Mani 和他細佬兩個Project令我想起下圖🤣🤣

20210227 撮記

　　今天是休息天，主要就是等昨天約了的房署師傅上黎而已。早上看了一些滑板片，記錄了少少心得如「手扶前腳膝」、「後腳不要太開」、。膝蓋微彎」、「core 收緊」，之後兩點三師傅上黎，清空了廚房方便師傅工作，兩點半師傅做完便走了，我善後清潔。然後便是打開電腦，聽生活行者的移民篇，內容有點亂但整體幾好的，因為主題有張力，然後幫studioCan 處理一下Email的問題。大約五點幫陸爸拎Ｄ食物上樓，然後等到七點陸爸買了晚飯回來。

　　基本上整天都沒有出門，本打算好好利用在家的時間用電腦，卻感到有心無力，結果很多時間都浪費掉了。畢竟今天是休息，自然是比較那麼不Productive 了。

　　去到晚上，因為要去紅磡報到，所以無論如何都要出門了。我不想整天就這樣就完了，於是帶了滑板，希望來一個晚上操練。九點半報到完，九點五十去到摩士公園，我泊在山下已聽到山上的滑板聲，有點緊張😆最後拎住塊板上到去，一黎就有一個小朋友走黎Yo 我打招呼，入到去滑板場亦有另一個中學生年記的來Yo 我，印象較深刻的是有一個鬼佬和我傾計，叫我學Ollie(果位小朋友也是叫我學Ollie)，之後我就係不打擾高手的地方練習，滑板場的地很好滑，輕輕一推就去了，很有Feel。

　　變了街童的我：

　　有一個爸爸很厲害，長期抱住個仔踩滑板，一邊踩一邊教仔，一邊比佢感受，我都想成為這樣的爸爸。看來他很想從小培養，訓練兒子😂

　　踩到攰，買了一支寶礦力，繼續踩，之後踩到飲晒支寶礦力就走了。在滑板場勝在有得觀察，我透過觀察，即使自己做唔到，但仍可比自己知道可以去到邊個方向。我初期是平路走，之後試了Ollie 發覺好難唔成功，之後扶住欄杆試下跳板，跳左陣就繼續平地踩，我此時此刻最需要的是板感，所以一定要多踩，係又踩唔係又踩。去到大約十半，人開始少了，只淨下一班高人在Freestyle，我試了試在台上踩落去落斜，好難唔得，由台上起步已經好驚，落斜一刻拎唔到平衡，即跌，心生怯意，試左幾次後便係平地上斜台，不斷試，總算用Muscle Memory 記住了重心的平衡，當然是用仆街黎交學費🤣踩到飲晒支寶礦力，便離開了滑板場，沿住摩士公園走走，每個角落都有一試板友在練，而經過訓練的我已有少少板感，在無人的闊道上我走得很順，溜得很爽，這種感覺我記住了！

　　跋：

這晚令我想起，我在英國時看到的滑板場，和今天我第一次在香港的滑板場的分別實在有夠大！

20210226 撮記

　　尤於昨晚很夜訓，我搵到一個叫shotcut 的免費視頻編輯軟件，很快上手，所以我玩左陣先訓。本來約了今日十一點返深水埗寫網頁，凌晨四點都仲見到Pong 未訓，我九點半一醒，見到良話佢炒車😱即刻傾電話，好彩人無大礙，皮肉之傷無骨折，算是不幸中的萬幸了。與此同時，「屋漏偏逢連夜雨」，有房署職員要上黎我地屋企，因為樓上單位有人塞左屎渠，要係樓下我地單位做清渠。今日打左比陸爸約左十點左右上黎影張相，我立即打去房署，同佢講有急事出門請職員儘快上黎，果不其然，不夠五分鐘便有職員敲門，然後快影張相，約左聽日搵師傅上黎就走。

　　十點三出車，十點半到瑪嘉烈醫院，去到已見到佢係架車到，應該剛掛完隊睇完醫生，我係第一個到，十點八幫佢拎藥，跟住地下綠色線，行兩層樓梯，不良於行既真係好唔方便，而家拎藥要問住址住咩室黎確認身份，好彩我有Mark 低。之後陪佢去醫院站崗備案。佢今次係龍翔道炒車，源於有的士佬係前面cut 線，佢收掣太急，失控訓車。的士佬已走，無仇報。好彩人無大礙，樂觀Ｄ諗，將來都係一個故事可以娓娓道來。

　　之後等到文傑同阿晴揸車黎到，佢架車比左阿晴揸，然後佢上左文傑車返局處理請假事宜。我順利成章離開，好攰，想返屋企但又驚一訓就唔知醒，唯有返深水埗。十一點三，瑪嘉烈醫院走，十一點半到深水埗，無人返，於是打算去附近咖啡店食個早餐呃下wifi，頂到有人開門，奈何走左去大南街，好幾間咖啡店都係唔提供wifi的，完。於是十一點五十分上左一拳書館，睇左不設售賣的「羊村十二勇士」，儘管內容是給兒童看，所以肯定是有修飾的，但好明顯這是一本禁書，想起中國大陸這些年來的禁書多不勝數，想不到在香港一本兒童故事書都可納入禁書之列。由於不可售賣，我拍下來放在此，只為一記，絕無他意。

　　最後係一拳書館買左380蚊香港大道，拎左一支香港本土製蒜香醬🥰

　　一點二到深水埗，開工，我手頭上有三個網頁未搞，都幾time consuming。做到三點三先出去買譚仔外賣自取，四點實在頂唔住訓陣，五點二開車，車D 海報文件去南昌邨，報名比賽，這是一個預防塵肺病的比賽，今日六點截止，所以我五點半就到南昌邨塵肺病中心交比賽文件。有趣的是我今天才知道這事，Pong 忽然叫我充人頭，結果我用了半小時製作了這張海報，雖然是粗製濫做但我老實說我覺得半小時做到咁真係幾勁 (儘管最後沒有交上去比賽😌)。

　　今日很多突發事情，比預期去多了好多地方，頭腦開始有點不好使，所以忙裡偷閒去了西九龍中心，買雪糕😋😍 我實在很欣賞老闆做出這麼多好味又平價又高質CＰ值爆錶的雪糕，這份為好多小朋友製造回憶的意義並不能在價錢上反映出來。正如我以前會跟朋友去西九龍中心打機玩灣岸，至今仍是一個很值得回味的回憶。之後亦順便買了水門雞做晚餐，因為我要大地行者。

　　返到深水埗，做多一陣野，六點九走，直接去兆基創意書院上大地行者。上到九點七完，大家都好耐無見，今次分了組，我將會和冬菇仔和一念晨曦一組係三月尾實習。走時落著大雨，我十分狼狽，但是又想到，這場雨應該只有極少數人能像我這樣開住電單車去感受，於是由狼狽的討厭變成自在的珍惜。

　　跋：

　　今日得知良炒車，令我想起了股票式人生和量化人生的概念，同時亦回憶起泰國炒車的往事。實在有感。

20210225 撮記

　　十一半醒，三點出門，臨時Bruce 話返去上環code review，我唔太有興趣，但本著齊上齊落原則，終究也要出門了。未食飯的關係，我去上環買海安，買左海安公司三文治，可能這是我最後一次機會返上環Tecky 了，算是完了我的心願。

　　係上環搵Beeno 整web socket，少少難，聽到最後有點眼訓😂之後五點九上環走，六點三到荃灣，七點三拍片，，七點五十食Dinner ，預到Michael ，我地一齊晚飯，傾了點是非，對於搵工Michael 顯得有點不自信，其實他幾fit 的，看際遇吧，八點五十返去。

聽三位前畢業生直播分享，讀哲學的女仔，讀數的男，讀會計的男，分享過去一年IＴ界的經驗，最記得Benny 分享，做一年，六個project。

1️⃣ Selina (Cohort 11)✔️Associate in Product Support Team◽剛剛於2020年12月畢業的Selina，入讀Tecky前是大學應屆畢業生。從Tecky畢業後受聘於一間全球超過1200名員工的跨國企業。該企業專注於開發資產管理軟件，提供PMS、OMS產品及支援服務。

2️⃣ Benny (Cohort 5)✔️Full Stack Developer◽Benny已於1年多前就讀Tecky，前職為Executive Office/MSC in Applied Maths，現任職的公司是提供AI服務及產品的軟件公司

3️⃣ Edwin (Cohort 5)✔️Frontend Developer◽Edwin入讀Tecky前是一位經濟學畢業生及於證券行任職交易員。於一年前於Tecky畢業後，現於室內設計工程公司擔任Frontend Developer一職。

　　十點直播完，圍威喂傾計，Alex 話而家有８個full time tutor，荃灣五樓，月租三萬，上環十一樓，月租五萬。真係估唔到租地方都有學問，又係煩。我地傾到十一點九先走。Benny 建議第一份工可以問多D，因為人地預左教你。最後，都明白IＴ Ｅ一行係學足一世的，係Bootcamp 我最大得著都係自學既習慣，畢竟好老實咁講，讀完出到去做野都係再學。

20210224 撮記

　　尋日好夜先返到屋企，今天九半便出門，佳陸爸車，因為約了StudioCan 十點三在銅鑼灣集合，事前完全不知道會做甚麼，大約十點七齊人後，我地行去廣旅集團大廈，果度有一間健身室，健身室老闆係阿邦的朋友，今日教我地一堂，佢倆今朝先係BNI開完「早餐會」，而我都係尋日第一次聽E個Terms。我地上左一堂健身堂，唔算太辛苦，因為教練aim at 比我地taste 下就算，做左一D基本操作，比如玩下TRX，做下負重訓練，主要操core，最後玩埋格鬥繩。

　　做完Gym 後，我地做左Debriefing ，問我黎緊一年有咩目標，又係老生常談。我在此記下，當作是一個牛年目標。

　　我地玩到一點四，之後大家係附近食左一間黃店，西餐廳，豬手煮得很好，在店內看到這個揮春，完全不知道是甚麼字，我估是「手速」二字。

　　之後就勁rush 的兩半走兩點五十五分到九龍灣，我地要上去一個中醫師診所Present 我地的網頁，很快簡介完，三半因醫師有症要睇，之後我們返了深水埗，繼續做野。由九龍灣返深水埗時我車了Randolph，傾計得知他10年曾在四川幫手重建，當時佢揸大膽電單車來回幾個村落，係很不錯的回憶。

　　四點二到深水埗，六點走。我同Pong 交代了我將會入了一間公司全職寫網頁，他表示支持。我本身諗住甩手，但佢目前仍需要我，所以變成Keep 住請我，轉夜晚返。我亦老實同佢講，我六月其實應該就有心無力了，要趁早搵人頂我個位，他說「不緊要，到時再算。」，儘管經驗了那麼多的我對任何人說的話都有保留，但我仍感到他的心意。

　　之後返一返家，帶了一件外套比Mani，待會要車Mani 去西貢，約左小丸子食飯。到了西貢，抱歉讓兩老久等，我們行去海邊一間BＢＱ餐廳，每人二百元也不算貴。很久沒和小丸子他們見面了，傾計倒不尷尬，感覺我們很投契。講起小丸子，我和他的緣份結於１７年， 一個二月舉辦的大空館天文班，我同佢因為搭同一架巴士走，所以傾下傾下計便結緣了，由佢搵我幫手「維城觸積」，再分享「1967當年今日」，再到19/20年的不時聚會，我會界定為我倆屬於知識上的益友，說白了，因為我好喜歡聽故事，而他喜歡說教事，大家又對歷史導賞有興趣，所以成為了朋友。

　　當晚我地傾了很多，因為太耐無見互相update了近況，比如知道他們租了一塊田黎玩，還約我們星期日去幫手；又講起尋日我去左JCI 聚會，原來小丸子以前都有參加過JCI，然後同我講，層次黎講，JCI < 獅子會 < 扶輪會 < 共濟會，作為第一次聽這些的我，感到十分有趣。

　　最後，我地互相拜年送禮，估唔到小丸子除了還書之外，更送書添！我很開心收到他的書，都是他覺得有價值的書，想分享給我，而且是自己編輯的，出面買不到。對我黎講，是小確幸，是一種肯定，更是一種知遇，我會盡力讀晒佢的！

　　BBQ 食到十點，然後送小丸子搭小巴，買10蚊七仔荼，遇上落雨，我和Mani 十點五十分開車，十一點三到紅磡，十一點半我到家。

　　跋：

　　在西貢碼頭公園公廁外，有一些小船，上面寫有「香港獨立」的字，之前曾被大公蘋果報導，政府職員用花瓶擋住，但相信不久將來應該都會拆了。附上圖一張。

20210223 撮記

　　十二半醒，一醒發覺原來今日屋企停電，所謂「屋漏兼逢連夜雨」，「攰塌遇上大停電」，原來成棟大廈今日例檢，會朝九晚六咁停電，陸媽都自己出門了，我今日四點有Monkey tree interview ，於是訓多陣，兩半疏洗一下便出門，去了上環tecky 「偷電」，回一回氣。四半走，我撞到Michael ，佢剛從Monkey tree interview 完，佢in 兩點。講左兩句關於interview既，然後我開車，四點九到Monkey Tree，等到五點二，阿Phil 出黎，我先知佢今日in 左好幾位tecky 同學仔（有Michael、Phil、同一位上環的同學仔）。
　　今次E間係教育中心，有猩猩做代言人，請backend (少少front end ) ，first stage 寫一個internal 既Platform ，比人login入去學野玩野報課程取消課程問問題，下一個stage 就係寫app (本身有，要優化) 。出20-廿幾K， 睇你個人。打算請4-6個tecky 學生。返朝9晚六半/朝10晚七半，自己計，暫時咁聽係咁。

　　Interview 叫我dem 返showcase 既project，叫我講下自己仲有咩project 吸引，叫我比D 意見project點樣幫到佢地做教育。問埋我stem education 有咩用，適合幼稚園。問埋我邊D 同學勁唔勁，我個個都讚。總之吹水mode ，好跳脫，因為唔會有second in ，唔洗見大老闆，in 我果位話晒事。

　　最後，佢off track 問我stem 教育，我講左D stem education 既products，但無咩意思，佢aim 幼稚園。亦有講起Snapask 仲蝕緊錢，揾緊天使投資者，曾經搵過Monkey Tree。

　　六半in 完，我直落要去太子，春夏秋冬火鍋(好耐未打過邊爐了)，同JCI 的人第一次聚會，當晚有幾個JCI的幹事，加埋會長，就同我地自介，講講咩叫JCI，由於我本身係識人先報名的，之後就講左Ｄ關於Pong 的事跡比我知，仲比我係佢地派既Booklet 搵到Pong 既相。最後我比面之下，聽左一大輪就比會費入左會，反正會費不多只是五百。最後十一點半走，十二點到家。

20200222 撮記

　　昨天五點半才回家，涼都唔沖就訓，原因在於今日十一點有一個interview。正是上星期五我見wordpress 那間，有Agent做中間人互相聯絡。十點醒，十點五出門搭鐵，十一點準時到炮台山，in 到兩點。

　　一黎有個test ，比部電腦你寫html css，bonus 係JavaScript 彈alert 出黎。再考你識唔識用wordpress，比你login 入佢wordpress 再整個網出黎（一個page only)。最後bonus 考你有無php 底，寫個php array 再用foreach print 個table 出黎。成個test 有電腦提供有得google 。

　　十二半見大老闆，佢都係老師出身，教英文，所以同聲同氣的，佢話出20K offer即請，我Mark 左老闆電話然後話星期四覆。佢接左二百幾個D-biz ，即二百幾個wordpress，條team 得四個人，而家請多三個人，返朝九晚六，（or 朝十晚七睇你需要），然後一齊輪晒D wordpress 佢。做野係一人分D wordpress ，得閒傾下方向，大部份時間自己搞掂左派比你既wordpress 就得。將來就係佢有其他project，可能要你見客，或者做佢digital marketing 既SEO 野。

　　之後我去左附近一間餐廳回氣，實在少攰，人都未醒就去左做Test。之後四點返屋企，休息一陣，約左子良整車，四點九開車，五點到車房，他要放低架車係土瓜灣，然後車佢去旺角Eprint，五點三到旺角Eprint，搞左一輪無結果，下次再去。遊完車河送他返車房，車整好了，他比了二百五蚊拖車費和千六蚊整車費，破財擋災了。一齊遊車河送他回家，然後我都回家眠一陣。

　　因為九點要報到，所以都訓唔得多，正好拎左塊滑板，今日又發生了這麼多事，約Mani 待我報到完便落街傾計。2045出門，2104報到，2113到紅磡，我們買了一杯清玉，然後沿紅磡灣兜了一個圈。我在踩滑板時有一下失平衡向後跌到，正好比Mani 望到正一正，回想起來實在好笑，不過也跌到我背筋少少扯住。我說：「我第一次踩電單車，就係你面前仆街，第一次踩滑板，又係你面前仆街，真係失禮。」。當日亦有街童踩滑板，他們踩得好型的，看得出凡是玩速度的東西都是講求平衡，他們的平衡很好。

　　而我們呢，則是偽街童。

　　由於約了人晚上開zoom 會，我十點半走，十點九到家開會，傾整Game事宜，結論是沒有結論。但我的視像鏡頭開不了，不知為何，做了很多Windows updates，在Google 爬了文也解決不了。

　　今天很忙，尤其是昨天很夜訓，有點吃不消的感覺，是在燃燒自己的青春嗎❓

20210221 撮記

　　今天專打下半場，上午在家休息，直至四點三才出門，去紅磡，順便入了油。由於今日Mani 的家人出了門拜年，所以只有我和她兩人，二人世界，我們看了Netflix ，整朱古力，開電腦做野，再準備晚餐，「乖」到我自己都不相信。當然這是基於尊重。晚飯時，Mani 亦叫了她的朋友Money上來，亦有提到Lydia最近有點失落。晚飯後，和她的家人及Money 打麻雀，玩了幾鋪，我出衝了比她妹妹和Money ，她們很開心，我成了最大輸家😭。

　　由於約了Mani 細佬要傾野，於是我十一點九走，先去報到，再去Mani 細佬家。第一次上他家，佈置得不錯，宛如一間大學宿舍咁，有品味，但願我在Mani 細佬的年紀時也能有一個家。之後我們傾了很多，包括試Code，諗Database，諗方向，傾下傾下不知不覺，我凌晨五點先走，順便問他借了一塊滑板（正因為早前買了Vans，故有動力借板踩下），試踩了一小段路，很難，日後再試。

20210220 撮記

　　尋晚游車河很夜訓，精神不太好。今天要和Mani 去生活行者的在屯門的新竇，再直落去大圍晚飯，第一次帶Mani 見雄仔和阿嬸。

十二點醒，去紅磡接Mani ，一點九紅磡出發，兩點半到屯門清涼法苑，泊好車，後面一輛七人車跟來，原來是陸爸，他來「探仔」。我們寒暄了幾句，他交代了過黎屯門買魚，經過順便來看看我，我拿出白爛貓和湊仔貓來引佢，最後陸爸幫我倆影一張合照。

　　生活行者的會很悶，沒有效率可言。但是其討論的題目亦是吸引的，分別有「移民」、「科技」、「小眾」、「動物」和「社區」，當中亦不乏具insight 的討論。

　　生活書院的新地方是一個佛舍，又是一個共享空間，比起本身大埔舊址細，大家都在適應。很記得有一個「移民篇」的問題，「假如你是丁丁（生活書院在大埔養的野貓），當你由大埔舊址「移民」到屯門新址，你會有何感想？」

　　在生活書院裡，看到這，有感拍下來。

　　六點三在生活書院走，七點到大圍美林。在惠康買了一些水果，七半上樓。和陸爸雄仔阿嬸吹水，關心下老人家，儘管Mani 食不慣當晚的菜，但仍表現得十分得體。雄仔看了我的炒股App後，便推薦了一個Medium 給我，內裡應該有一些岩用的東西。我們九點九走，我送Mani 回家，然後報到，最後十點九到家。

　　跋：

　　由於阿嬸不良於行，加上過去疫症下不得離開老人院，可想言之其實生活不輕鬆。我當晚不時想，每當我覺得自己好慘時，想像一下，假如我（有幸）活到七八十歲，如果要面對一系列的身體精神問題，我現在所遇到的，其實只是小兒科。更重要的是，我要努力活好每一天，日子才不算是白過，起碼當不幸到來時，我亦不會後悔當初沒有善用時間。

　　其實我今天本是要去大地行者在鹽田梓的露營，但無奈種種限制下我被迫取消，感受到很深的無奈感。又調轉頭諗，如果無發生咁多事，我又點會報大地行者？但是，好肯定這是我人生中其中一次令我後悔和無奈的事，我損失的並不單單是一次露營的機會，而係一個和大地行者們寶貴難忘的回憶。但回頭想想，今天我何嘗不是又和生活行者們和Mani 雄仔阿嬸陸爸們建立了一個特別的回憶? 人生就是這樣。

20210219撮記

前幾日實在太攰，太多資訊。今日十二半醒，約了夜晚和良拎電單車，他買了新電單車，前幾日已試了車，今日拎車。 本來今天在家休息，好好整理一下自己的思緒。Mani 今日突然眼鏡爛左，跌落地後眼鏡框斷了。用bluetap 臨時貼住，算是有急材了。所以我五點三出門，相約她到旺角配眼鏡。

出門前，收到Tecky announcement ，話有工係請人有wordpress 經驗，我本身已經有CV 比左Alex ，所以直接請Alex refer 比agent 。

去到旺角，和Mani 配左眼鏡，食左小食，買左壽眉，然後夜晚七點先走，買了輕便晚飯回家。

十點出門，先到九龍灣接良。他買了一架Vespa， 06年車，三萬四。文傑家寶都黎，良先坐我車尾去貝沙灣拎車。

然後由文傑揸返去九龍灣，買糖水，之後再揸去郵輪碼頭遊車河。

　　很巧合，剛剛星期三在Tammy 家樓下橋底，Mani 見到一架螢光綠的MSX電單車，正好和文傑家寶今天揸的車同款。

小事故，臨走時，我踩了良的Vespa，兜了一個圈，他們在原點等我。怎料才剛出去，Vespa 就入錯波，我的手把是指示我在3、4波，但車卻是空波，於是我扭到車可以入到波郁到時，其實已很不穩定，連忙回去原點。泊好車，跟大家說了句「剛才感覺很恐怖」，但似乎大家都不過如此。待了一會，大家準備走時，良發覺他的車著唔到波，原來在我揸時已出事了……

　　結果很不愉快地，又不幸中的大幸，波係壞左，但起碼著到車，入到一個唔知咩波，可以向前行。由文傑揸返九龍灣，明天再算。

　　這一晚的心路歷程，在此快記：

先有試車的恐怖和慌張，後有平安返原點的淡定，到大家準備開車時良開唔到車的不祥感，到利用排除法知道係自己揸完先出事的不安，到確定車真的是壞了的無奈和愧疚，到順利著到車的驚喜，到車到返九龍灣的樂觀（遲早都會發生），短時間內我的心已回復平靜，是隨遇而安的修煉。