20220203 撮記

　　八點Mani Morning Call 叫醒我。八點八出門，八點五十到尖沙咀，九點導賞。

　　九點八完。九點五十返到尖沙咀。
　　今日第二次導E條路線，有好多位生疏左，好彩Victor 提我，比如N音同R音，tone ，gimbal control 等等。
　　十點三尖沙咀走，同Wilson 解釋返尋日Lapco 電腦「無手尾」問題，這是我交代左比Peter 的，只是裝返捷徑然後收好就得，而Eric 唔想Peter 分心，而我已返深水埗，Peter 燥左就影相上Group。
　　十半開車，買35蚊魚蛋燒賣同瓷飯，十點五十到旺角，好耐無食過瓷飯了😋有點懷念，滿滿的回憶。

　　Christian 上星期二去楓樹街驗，今日終於收到電話通知，而佢已經好返晒變左陰性😂政府做事有夠快的。

　　食完早餐，沖過涼，十二點訓，三點九醒，上天台淋花，有人曬腐皮。

　　四點二，陸爸電話通知我到，我落樓下，見到陸爸同陸媽一齊行過黎，這我才醒起，今日係3月3，係陸爸陸媽結婚週年紀念日，陸爸專登放假，今日佢地出街，順便黎旺角派物資。這些日子大概就係保持小確幸的一種吧😊。

　　拎左水果，蓮花清，厚興手撕雞同炸魚蛋，疫情關係，我就費事同佢地行，上返旺角。

　　煮個公仔麵，連手撕雞一切食，然後七點上Arduino 。

　　六點半，好快咁整左一個demo project，for 陣間上堂用，畢竟教班要學員自己用手頭上既arduino 燈帶整project ，咁作為老師都需要有個standard 比大家，如果唔係好難跟得上😂。

　　十點落堂放走晒D同學仔，其中部份留低，幫佢set 埋線，十一點落堂。

　　十一半良哥打黎，原來阿蛋都有揾佢返工，佢返唔到。之後例牌講一大輪東拉西扯😂十二點三先傾完。

　　今晚set 左Geforce account ，同Christian 打機。玩CS GO 。
久違的打機感覺😎

　　凌晨兩點洗衫，backup 手機，打CS GO ，三半訓。

跋：

今日睇到一篇文，有個前線醫生講疫情，E幾日又有Carina 搵我，所以我share 比佢，又發覺幾有道理，驚將來無得睇，特此係度留底。

身為一個公立醫院醫生，真係睇唔過眼呢一場「人禍」。
先係疫情初期，政府不斷發放變種新冠肺炎(Omicron)有幾嚴重有幾得人驚，迫香港人用安心出行App，結果呢？班高官自己開party唔用app，一連串社區爆發突然出現。政府專家理應知道變種新冠肺炎同普通Common cold / Flu差唔多，但就係都要嚇你。係一連串無效嘅圍封強檢之後，最應該改行與病毒共存嘅策略，同西方國家一樣，亦係世界大方向，先可以避免整爆香港醫療系統。結果政府完全唔理，係都要跟上面一樣乜叉動態清零，完全不切實際冇科學基礎。
今時今日公立醫院病床爆煲、病人訓街、重症病人得不到適當治療、危殆病人等半日先到急症室、醫護人員工作量爆炸，以上種種情況是誰造成相信大家心中有數！COVID 有幾嚴重，大家中過都好清楚，我地見大部分 COVID patient，就算中哂所有 Risk Factor 又 Unvaccinated 都可以冇乜 Symptom，我地好多藥都唔洗落，只係做 Routine CXR 同 BT。單純 COVID 呢個病嘅 Management 根本就極少，因為 COVID 而危殆嘅病人亦極少。但政府就係要將人手分去去做哂啲 Isolation，去應付 ICN 做 Contact Tracing，去配合政府做檢測做化驗，搞一大堆無意義嘅文件。
結果呢？冇人手去處理一大班因為比政府嚇入醫院嘅病人，當中入到A&E就死果班危殆果班好多都係本身已經有其他 chronic disease，冇人手冇設備冇時間冇空間，果班人好快就差，仲未計一班等左半日都未入到 A&E 嘅 CVA (ICH) IHD cardiac arrest Cat I case。正正係因為政府唔肯面對現實，死都要清零，令到一班市民以為個病好嚴重衝入急症室、因為政府嘅檢測令一班返唔到工嘅人衝嚟A&E 拎 SL，一車車老人院職員一見有院友確診就掉哂啲老人家嚟，谷爆公立醫院，而本來一班最需要緊急照顧嘅病人延遲幾個鐘送院導致死亡。死嘅大部分人都唔係因為新冠肺炎，而係無辜本來唔洗延遲送院/治療嘅香港人。
已經唔同你講 HA 令人冷笑的policy，一開頭跟實政府話個病有幾嚴重要點樣 Contact Tracing，郁啲就計你 Close Contact 要隔離唔知幾多日。。好啦到而家，玩出火啦，又多人中又多人返唔到工就話 HA staff 唔係一般市民，中左之後7日就可以返工，最嘔心係聽到班 top management 話我地好樂意返工。。。個龍門同政府一樣任佢搬！我地返工係為左醫人救人，唔係為左幫政府補鑊！
講到呢度，我已經唔知仲可以講咩，香港人自求多福啦，而家呢個時勢唔係驚感染新冠肺炎(Omicron)，係要希望自己唔好感染其他嘅病。。。香港醫護逐個逐個移民，大家自求多福啦。