20220324 撮記

　　八點九醒，九點四出門，揸車，九點半到老地方，九點七到殯儀館，Mani 一早問左，原來係「榕樹下」。

　　十點儀式開始，扶靈，送亡者出黎，全部人贍養遺容。十一點二出殯，走，大家去富山火葬場，我同三個師傅同郭景威去觀塘，需要放底D布帳。十一點五到觀塘，泊唔到車。我比師傅先上去，我出去兜個圈，十一點五十終於泊到車😎上肥仔度。幫佢換水，換貓砂，換罐頭，疏毛。

　　十二點二走，十二點四開車，十二點九到紅磡敏華冰室，二人枱，同Mani 同枱。

　　一點二埋單，我揸車車走Mani ，落停車場仲尾轆撞𡒊🙀一點半上紅磡。落雨，大家都攰，我識做，一點四十走。

　　一點五十到油麻地，兩點上旺角。

　　Christian出左去，佢開左打機聲，我以為佢係度，結果我係廳同空氣講野😂之後沖涼，沖完涼Christian返，同Christian 食雞，順便洗衫，三點佢去做gym ，三半洗完衫，彈琴，連續彈得晒全首天空之城（淺version) ，天空之城（難version) ，Canon in D，高山低谷，雖然偶有失手，但Practice makes perfect 嘛。
　　之後練菊次郎的夏天，四點五十返房抖。

　　子良分享左佢隔離段片，so far 都算唔差，尙算衛生。

　　上網睇到Ｅ篇文，《職場上，真正聰明的人，常常「慢半拍」》。

　　六點九訓醒，七點二出門。七點三搭鐵，搭錯方向，去左太子😅七點七到紅磡。

　　搭鐵時睇到手機😆覺得好中，今個世代個個係linkedIn 都好打得，但出到黎係失業的。

　　Bowie 打黎呻佢請人好麻煩，尋日請，今日返工，出晒事。Ｅ個年代，請人慘過打工🤣

　　係紅磡晚飯，無開電視晚飯，邱爸講比面，風光，邱媽講茶記廚房多老鼠。

　　幫Mani 寫essay，佢聽晚Deadline，十一點走，十一點四到旺角。

　　係Facebook 一個移民grp 入面睇到，成功係加拿大揾ＩＴ工，有志者事竟成😎佢係勁既～付出咁多，祝佢係果邊順利🤗

　　返到旺角，揾榕樹下既樂譜。

北國之春

　　食雞，打唔到call of duty，玩pubg。

　　臨訓時睇左試當真既「Channel 需要搬」，都幾盞鬼，尤其是講NFT 果part 😂利申我無追開試當真，今次係我臨訓係Facebook loop 一百毛時睇到的～

　　兩點七訓。

跋：
睇到一張Meme 圖講LinkedIn ，睇到路飛係太陽神😂艾斯白死。