20220223撮記
十點二醒，十點七出門，尋日無登出Easybilling ，所以Wilson 用唔到。我即刻remote 熄返（原來Wilson尋日已remote熄左）。十點四十搭鐵。十點五十五到深水埗，十一點二Wilson 走。拎左匙卡，傾左佢有舊同事係英國想整wordpress 。
又話Software 好易爛尾，因為期待落差太大。
Lunch time 買七百蚊燈帶，今日先知WS2812 有膠包住。買33蚊雙餸飯。係同一間雙餸飯，不過肉餅黎講，旺角吸引Ｄ。一點九返office。
Eric 分享，以前年代，賣一部電腦賺兩萬。
搞Lapco 電腦，好麻煩，五點半收工。五點七搭鐵，五點九到旺角。拎projector，六點返上旺角角五樓，再拎封信落樓下比Connie，但Connie未有咁快到，上天台溫書，温聽日導賞，順便睇下封信。
見到滿地可，聽就聽得多，一直以為係法國地方，原來係加拿大。
六點四落樓，六點半見Connie，比同行甲乙丙既信佢。六點八返上旺角洗衫，整Arduino。
發覺一餅燈帶有300粒LED。
見到網上有python game tutorial，有空可一試。
揾Christian 幫手，用熱溶膠痴燈帶，八點八出門買飯。
買47蚊大家食，發覺癡唔到燈帶😂一定要辣雞先得。九點同明天助教Henry 同 Larry zoom ，十點zoom 完。
Zoom 完後繼續整Arduino ，十一點十一沖涼，十二點七，入房温導賞。
Christian 應該係訓得太多，夜晚一點出房打機，然後約一半，佢開我房門叫醒我，佢話見到老鼠🙀我心諗明天仲要早起導賞😢最後都決定落床。
最後都出房一齊研究，左揾右揾，最後開老鼠喇叭。一開老鼠喇叭，嚇到本身匿係櫃底既老鼠即刻跳出黎，快速爬上天花板既抽氣糟。
我見到時既第一反應就係「哇🙀」，哇，哇😆
跑左上天花版，咁就肯定下面櫃底無窿了，最後加固封左條槽。拉條抽氣喉出黎，填埋個窿佢。
真係估唔到😂老鼠喇叭都幾犀利，真心有用～
跋:
今日係Facebook 睇左一篇Omicron 開箱文，又咁岩Christian 中左招，我覺得十分扣題～考慮到Facebook 隨時刪文，係度留底穩陣～
《我係如何開始發病？》 年初八因為我有新同事返工而返咗公司，接近放工時我開始覺得唔舒服。好抱歉嚇親嗰兩位新同事，如果第一日返工就傳染到，真係幾唔抵嘅🙈 開頭我覺得頭痛、發冷、背脊痛、無力，就立即call的士諗住回家休息，但因為我擔心自己有冇中招從而傳染俾人，結果我去咗附近嘅社區檢測中心落車，落車後我都嚇咗一跳。現場保守估計幾百人排緊隊，未計我見唔到嘅人龍，而當時距離檢測中心關門時間只有不足半小時，而輪候時間卻要幾小時。因為覺得越嚟越辛苦，結果都係返咗屋企休息，第二日先做檢測，而當晚就開始發高燒。跟住病住都要通知我見過既人，好在暫時都冇人話俾我知我傳染咗比佢，當然我亦唔知道邊個傳染俾我，但我覺得喺現時確診數字下，呢樣嘢無謂深究。 《懷疑確診應該點樣做？》 已經開始病、已經好唔舒服嘅朋友，奉勸千萬唔好去社區檢測中心walk-in做檢測，除非你確認嗰度係唔使排幾個鐘頭隊，或者你已經做咗網上預約。病咗已經好辛苦，再喺寒風中等幾個鐘只會令你更加病。 根據衛生防護中心指引，檢測中心只係俾冇病徵嘅人去做檢測(雖然喺數字創新高嘅情況下都幾離地)，如果懷疑確診，應該係去衛生署診所睇醫生，但當然唔好戇居居去walk-in 然後呆等，佢哋係有得電話預約的。冇錯，2022年仍然係冇網上預約系統的，只有電話預約系統，但其實我覺得都算幾方便，幾分鐘就預約到當日嘅時段。如果網上預約社區檢測中心，起碼要幾日後先有位。 ==衛生署所有普通科門診診所-地址及預約電話號碼== https://www.ha.org.hk/visitor/ha_visitor_index.asp… 《自費快速檢測套裝、社區檢測中心/流動檢測站、衛生署診所有咩分別，應該揀邊樣好？》 自費快速檢測套裝*#：唔使預約，唔使排隊，立即知道結果。適合只有少少唔舒服，想求個安心；想每日做檢測確保唔會傳染到身邊人；已經開始發病，預約咗做檢測、睇醫生，仍想預先知道結果既朋友。唔能夠取代官方嘅檢測結果。 * 深喉唾液版本: 先要唔飲水唔食嘢兩小時; 鼻咽拭子版本: 隨時隨地即刻做 # 如快速測試結果呈陽性，可由今日（二月二十一日）起致電政府為「快速測試結果呈陽性人士」所設立的24小時熱線2280 4772，以獲安排專人上門派送鼻腔拭子樣本收集包及收取樣本進行核酸檢測以作覆檢，費用全免。(呢個電話我未打過，希望你打得通😂) 社區檢測中心/流動檢測站：有啲地方自費都要排半個鐘，睇吓你有幾病同埋可唔可以吹風。完成檢測會即時收到確認短訊，有結果後會收到短訊，可以下載檢測報告電子檔案。 衛生署普通科門診：只要預約到就唔使等。有得睇醫生，聽吓你個肺有冇事，感覺上會安心啲。可以即時攞到病假紙。醫生會比藥你食，成為50大元。要攞樽仔返屋企，第二朝一起身留深喉唾液，然後拎返返去，可以叫屋企人代勞。檢測結果會以短訊或者電話通知。 《確診指引？求助無門？》 有睇新聞嘅都應該知道，萬一你確診咗(收到檢測報告陽性/收到衛生署電話通知陽性)，就要等衛生防護中心正式嘅電話通知確實嘅安排。而呢個電話要等幾耐呢？我就等咗成個星期啦😂 我嘅情況就比較特別。 首先係衛生署普通科門診嗰個醫生打電話俾我，預先話我知個結果係陽性。咁佢就話我應該要等待衛生防護中心嘅正式電話通知同埋相關指引和安排，睇吓係會去糟糕灣定安排入院，家人如何隔離等，但言談間都話而家醫療資源緊張，確診個案急性，可能冇咁快會等到電話通知。佢都好好人，問我病情如何，有急切需要就要打999(例如呼吸困難、心悸)，建議我同屋企人分開進餐、在家戴口罩等等，好明顯都係從心出發，無指引去俾佢跟住讀。 跟住佢仲俾咗兩個衛生防護中心同一個民政事務署嘅電話俾我。頭兩個電話係打去同一個系統，主要都係撳好多個數目字，然後留言。民政署嗰個係廢嘅，好容易打通，但冇一條問題答到我，淨係叫我等衛生防護中心電話。 衛生防護中心電話 2125 1111 2125 1122 (大家確診咗可以打去留個言，話唔定幾日後會有人會覆你) 《要瞓醫院門口？差點入糟糕灣？》 我留咗言幾日，終於收到衛生防護中心電話。呢個係一位文員，佢同我核對個人資料，問我攞咗屋企地址，然後佢話要再等另一個衛生防護中心嘅電話。我問會有乜嘢安排、我會被送去邊(講真好驚要十幾度瞓街😅)、同住家人如何隔離，佢全部都唔知，話另一個同事會打俾我，結果我係收唔到呢個電話。 然後過幾日，消防處打嚟，話安排咗車明天送我去糟糕灣😣講真嗰時我仲好唔舒服，咳到癲咗，喺屋企都瞓唔到，仲要入勁凍既糟糕灣，心諗死緊😔好在我多口問一句，入去要住幾耐、點先出得返嚟、家人如何安排等等，佢就話衛生防護中心應該已經同我講咗，我就話未收到呢個電話。咁佢就話要先同我取消架車，俾咗個電話號碼我去追問衛生防護中心確認咗先(我突然間感受到公務員辦事跟程序嘅好處😂)，然後我個心暗喜左一下。咁呢個電話號碼呢，當然都係冇人聽啦😂 然後我又再等多幾日，終於收到衛生防護中心電話，講關於家人如何開始進行家居隔離(距離我發病已經個幾星期😅)。然後佢哋好驚訝點解我仲係屋企，以為我已經入咗糟糕灣住緊(我心諗你哋冇記錄㗎咩😅)，咁我講返個故仔俾佢聽，然後佢就話聽日會搵車來接我入去，今日有人上門安排家人進行家居隔離。因為我已經好返好多，起碼夜晚瞓到覺，只係間竭性咳到停唔到，反而我係抱着興奮同期待嘅心情，好想入去住下體驗下😌 《家居隔離、電子手帶、自我檢測》 到咗第二日，等咗成日，到夜晚終於收到電話，話因為入邊已經爆咗，我又已經病咗咁耐，所以唔使入去住，可以同家人一齊開始進行家居隔離🤣🤣🤣 跟住隔冇耐，有人放咗4隻電子手帶喺我屋企門口(有1隻係spare)，然後再收到政府資訊科技總監辦公室IT Support既電話，step by step教我哋download個app同埋登記3隻電子手帶。做完之後無耐，就有個全副裝備嘅姑娘到咗我屋企門口，俾咗兩套(每套6個)檢測套裝俾我哋。咁我哋明明三個人，但佢就得兩套，而佢話唔知點解，都係俾咗電話我去問。不過其實每個人只需要檢測四次(第1 4 7 10日)，兩套其實夠個人用，佢話我哋可以照用。然後第12日就自行去檢測中心(要預先通知佢哋，帶着手帶離開屋企係犯法)，如果都仲係陰性，隔離令就完成。 《病咗食咩藥？應唔應該睇醫生？》 係呢兩個星期，我睇咗兩次醫生。第一次上面講咗，第二次係確診之後幾日，連續幾日都咳到傻咗通宵瞓唔到(每幾分鐘到十幾分鐘咳醒)，轉過幾隻咳藥水都無效，我都驚個肺有事。咁啱公布咗醫管局指定診所俾輕微確診者去睇，我第一日就已經走左去幫襯。需要預先打電話預約，去到得小貓三四隻，過程順暢，費用全免。醫生聽完我個肺，睇過我喉嚨，無乜事，頓時安心左。我當日來回都係搭的士，之後推出埋抗疫的士接你來回指定診所，全港好似得幾百部，都係要電話預約，大家有需要嘅可以試吓，詳情連結放在留言。 其實兩次醫生都係俾咗呢四種藥，上網睇醫護專頁都係咁講，包括撲熱息痛(必理痛)、咳藥水、收鼻水藥、喉糖。撲熱息痛可以舒緩發燒、頭痛、肌肉痛、喉嚨痛；咳藥水某程度上可以止咳、化痰。當你病得好辛苦、咳到傻咗嗰陣時，舒緩咗有覺好瞓，真係好重要。但留意撲熱息痛唔可以過量，同一時間唔可以食兩種唔同嘅撲熱息痛。唔好自己買消炎藥食，有研究指出某種消炎藥可能會令病情更嚴重。如果確診咗但唔想/唔需要睇醫生，自己買呢兩隻藥食都可以，然後慢慢等衛生防護中心電話。 《咳到傻咗點算好？有咩其他方法？如何預防交叉感染？》 正修讀營養學嘅我，當然會認同確診者係需要靠自身免疫系統去令身體痊愈。其實醫生都係咁講，因為藥物只係舒緩病癥令你冇咁辛苦，無論你有冇打疫苗，都係要靠身體免疫系統去自己打呢場仗。要快啲好返，身體就需要更加多相應嘅營養補充，所以呢兩星期我都補充左大量嘅營養素，令到自己快啲好返同冇咁辛苦。 如果咳到傻咗停唔到，食咗咳藥水、飲熱水都冇用時，我有個方法係用個鼻聞熱水。用蒸氣濕潤氣管，D痰會容易d咳到。另外有個醫生朋友話，以前有個方法係聞d滴咗白花油/雙飛人嘅熱水，不過佢都無係醫院見過，唔知有幾work，如果有就一試無妨咁話喎。 一開始發病就要全家戴口罩，好重要！頭兩晚發燒未確診，我媽咪就係冇戴口罩照顧我，所以傳染咗。不過佢打咗疫苗，所以只係咳。另外就係如果你屋企都有部可以過濾COVID-19既空氣清新機，記得長開高風速，唔好校Auto，放喺啱嘅地方。始終就算分開食飯，都有除口罩嘅時候。當然口罩係唔可以代替，盡量留喺自己房入面活動，減少同屋企人接觸。 《總結》 冇病嘅大家都要飲多啲水，喉嚨保持濕潤係可以減低中招嘅機會。未病嘅時候就要補充多啲營養素，減低發病機會。 病咗就快啲去檢測，早啲確診早啲休息早啲好返。趁而家因為資源問題只可以家居隔離，唔使天寒地凍瞓街、入糟糕灣，喺屋企瞓，病咗都會快啲好。萬一遲啲偉大嘅火神山搬咗嚟香港，又或者你要瞓社區中心、學校嘅禮堂，你同隔離床大家凍到輪住咁咳時，仲要入住左之後唔知有咩準則可以出返嚟，就真係恭喜你了。 祝大家和香港早日康復，大步攬過😁